Llega a Asturies la primer familia ucraína  

Nos díes vinientes siguirán llegando delles families d'Ucraína al Principáu

Los primeros refuxaos ucraínos qu’escaparon de la guerra yá descansen n’Asturies. Llegaron nel so vehículu hasta Xixón. La familia ta compuesta polos padres y tres menores de 13, 10 y el más pequeñu de namás un añu. Una pancarta n’español y ucraínu dába-yos la bienvenida.

Escaparon de Gostómel, una pequeña ciudá nel estrarradiu de Kiev y dirixéronse pel oeste hasta atravesar la llende per Hungría. Un percorríu per carretera de siete díes qu’acabó esta tarde n’Asturies.

 A la so llegada amuesen les imáxenes del so edificiu y barriu bombardeaos. La decisión d’abandonar la so casa posiblemente-yos salvare la vida, anque parte de los familiares de Sergey Katrechko, sicasí, nun pudieron abandonar les sos cases- 

Agora cuntarán cola ayuda d’otru miembru de la familia, Anastasia Zhytnyk, una moza ucraína de 24 años, residente n’Asturies dende va tres años y que yá exerce de traductora. Esplícanos cómo vivieron los neños los bombardeos. 

La so llegada débese en gran midida a les xestiones de la ONG Expoacción. Vivirán de forma temporal y hasta que se-yos asigne una vivienda definitiva nel centru de terapia ocupacional Ovida, n’Uviéu.​